BAGUIO CITY – Impanamnama ti lokal a gobyerno ti Baguio a nainget a mabantayan ken masukimat dagiti suplay ti COVID-19 vaccines a maisangpet ditoy siudad tapno maipasigurado a maipaay daytoy a libre kadagiti kwalipikado nga umili.
Kasaruno daytoy ti maipadpadamag a mailaklako dagiti suplay ti bakuna ken adda ti agpapareserba iti vaccine slot kadagiti sumagmamano a lugar sadiay Metro Manila.
Iti panakiuman ti Bombo Radyo Baguio, impasigurado ni City Administrator Engr. Bonifacio Dela Peña a saan a maitulad ti siudad kadagiti lugar a mangipatpatungpal iti naanomalyaan nga aramid.
Kinunana a nasken a mabilang ken mairekord amin dagiti mairuar a suplay ti bakuna sakbay a maiwaras kadagiti nabigbig a vaccination sites pakairamanan ti SM B1 parking, University of Baguio Gym ken SLS Incorporated.
Innayonna a pagbasaranda ti kinaado dagiti indibidual nga agpila kadagiti vaccination center iti panangipaayda ti doses ti bakuna tapno maipasigurado nga awan ti sumubra ken agkurang kadagitoy.
Inyunay-unay pay ni Dela Peña a saan a mabalin nga agpareserba dagiti indibidual iti vaccine slot no sadinno saan a mailaksid ditoy dagiti empleyado ken opisyales ti gobyerno.
Impaganetgetna a saan metlaeng a mainaganan ti brand ti bakuna kadagiti indibidual ngem nupay kasta, impasiguradona a dagiti bakuna a maipaay ket maiyanatop iti edad dagitoy.
