Inaklon ni City Administrator Engr. Bonifacio Dela Peña nga addan iti kritikal a sitwasyon ti siudad maipapan iti suplay ti danum kagiddan ti mapaspasaran a weather phenomenon iti agdama.
Iti interview ti Bombo Radyo kenni Engr. Dela Peña, posible a maipada ti siudad ti Baguio kadagiti dadduma a lugar iti pagilian a naipasidong iti State of Emergency gapu iti epekto ti El Nino.
Nupay kasta, impaganetget ti opisyal a mabalin a maliklikan daytoy laketdi agtulnog dagiti residente iti panagkonserba ti danum.
Innayon ni Engr. Dela Peña a maibasar iti panagmonitorda, dandanin maibusan ti water reservoir a kangrunaan a pagtataudan ti suplay ti Baguio Water District, kasta met nga in-inut a bumabbaba ti mapatpataud a danum kadagiti deepwells.
Gapu iti dayta, maiyunay-unay iti publiko ti panagtipid iti panagaramat kadagitoy ken panangipaskil dagiti agtagikua kadagiti nagduduma nga establisimento ti palagip seknan ti panagkonserba ti danum.//Bombo Rob Dominguez
