Ginuyugoy ti Philippine Red Cross – Benguet Chapter dagiti umili nga agdonar iti dara tapno makatulong kadagiti agkasapulan.
Sigun kenni Oscar G. Paris, Chapter Administrator ti Philippine Red Cross (PRC) Z- Benguet, agkurkurang ti suplay ti dara iti probinsiya kagiddan ti panagngato ti bilang dagiti pasyente nga agkasapulan iti daytoy.
Dinakamatna a karaman kadagiti pasyente nga agkaskasapulan ita iti dara ket dagiti nakaptan iti dengue malaksid pay dagiti komplikado a sakit.
Mainaig iti daytoy, dinayaw ken pinagyamanan met ni Paris dagiti blood galooner a regular nga agdondonar iti dara.
Binigbigna metlaeng ti kontribusyon dagiti nagduduma nga ahensiya ken organisasyon a mangipatpatungpal ken mangidadaulo iti blood donation activity.
Karaman ditoy ti Bombo Radyo Baguio ken Star FM Baguio a nabayagen a partner ti Philippine Red Cross nasurok sangapulo a tawen.
Maipalagip nga idi Nobyembre 18, 2023 ket nangipatungpal ti Bombo Radyo ken Star FM iti blood letting activity idiay La Trinidad, Benguet ken idiay People’s Park, Baguio City a napauloan iti Dugong Bombo: A little pain a life to gain.
Bayat ti nasao nga aktibidad, nasurok dua gasut nga indibidual ti balligi a nagdonar ti dara.
Naituding a mangipatungpal manen ti Bombo Radyo iti blood letting activity inton Nobyembre 16 ita a tawen a maangay iti siudad ti Baguio ken idiay La Trinidad, Benguet tapno ad ado pay nga indibidual ti matulongan.
