Posible nga agkurang ti suplay ti itlog inton Abril ita a tawen, sigun iti Department of Agriculture.
Dinakamat ni Agriculture Secretary Francisco Laurel Jr. a nag-oversupply ti itlog idi napan a tawen isunga bimmagsak ti farm-gate price iti P4 tunggal pidaso ti itlog.
Ado a local producers ti nalugi rason a napilitanda a partien dagiti agit-itlog a manok tapno mailakoda ti karne dagitoy ken maaddaanda iti kita.
Gapu iti daytoy, bimmaba ti dakkel a populasyon dagiti agit-itlog a manok a posible met a makaapektar iti suplay ti itlog iti masangwanan.
Impetteng ti Agriculture Secretary a kasapulan ti local poultry raisers ti hatching eggs kagiddan ti panagrugi ti panagngato ti demand ti itlog.
Ginuyogoy met ti nasao nga opisyal dagiti
financial institutions a mangipaay ti pondo tapno masuportaran ti repopulation efforts ti industriya.
Kinunana a makatulong daytoy tapno saan a mapasaran ti krisis a kas iti napasamak idiay Amerika nu sadino nangitunda ti avian influenza outbreak iti culling ti minilmilyon nga agit-itlog a manok.
