BAGUIO CITY – Impeksa dagiti mayor iti entero a pagilian ti agtaltalinaed a panagsuporta ken panagtalekda iti liderato ni Baguio City Mayor Benjamin Magalong kas Focal Mayor para iti kampanya ti ti League of Cities of the Philippines kontra iti kriminalidad ken iligal a droga.
Nailanad daytoy iti statement of support nga impatulod ti liga kenni Mayor Magalong.
Impeksa dagiti mayor dagiti siudad iti pagilian ti panangdayawda iti liderato ti COVID-19 Contact Tracing Czar gapu iti panangbukel daytoy iti komprehensibo ken sistematiko a wagas ti panag-contact tracing.
Kinunada a ti sistema ni Mayor Magalong iti contact tracing ti nangpabileg kadagiti nagduduma a lokal a gobyerno, partikular iti panagaramat iti innovative ICT solutions ti siudad ti Baguio.
Dinakamatda nga iti panangidaulo ti mayor ket nabaelan ti Baguio a naituloy ti panakakissay ti panakaiyakar ti COVID-19 iti siudad a nagresulta iti in-inot a panakailukat ti ekonomiya ti lokalidad a maibilang a ‘best practice’ iti entero a pagilian.
Dinayaw pay ti liga ti natibker a commitment ni Mayor Magalong iti accountability ken hustisya kalpasan nga inaklon daytoy ti kaadda ti panagkurangna idi saanna a dagus a sinitar dagiti nakita a panaglabsing iti health protocols iti dinar-ayan daytoy a birthday celebration ditoy siudad.
