BAGUIO CITY – Agkidkiddaw ti Police Regional Office Cordillera (PRO-Cor) iti suporta dagiti netizens iti rehion para iti panagbotos dagitoy iti pannakabagi ti Cordillera PNP iti maangay a Search for GandaPulis wenno Miss PNP 2017.
Sigun kenni PCI Michelle Bagayao, pannakangiwat ti Benguet PNP, mabalin nga i-like wenno i-share kadagiti netizens ti ladawan ni P01 Yutanilyn Navarro iti official Facebook Page ti Search for GandaPulis 2017.
Napili ni PO1 Navarro a mangibagi iti PROCOR iti nasao a pasalip manipud kadagiti innem a probinsia iti rehion.
Agingga laeng inton alas dos ti malem ita nga aldaw ti panagbobotos ken dagiti sangapulo a kaaduan ti botos ti direkta a makualipkar para iti preliminary round ti kompetisyon a maangay iti PNP Headquarters sadiay Camp Crame, Quezon City.
Sigun kenni Bagayao, ti nasao nga aktibidad ket naisangsangayan a programa ti PNP kagiddan ti panakarambak ti Women’s Month ita a bulan ken para metlaeng daytoy iti pannakaital-o dagiti naaramidan dagiti pulis.
