BAGUIO CITY -Agtalek ti maysa kadagiti mangidadaulo iti transport sector ti Cordillera a suportaran ti sumaruno nga administrasyon ti parapubliko a transportasyon iti pagilian.
Iti interview ti Bombo Radyo Baguio kenni Pat Cordillera, kinunana a nasken a mangngegan ti arungaing iti sektor ti transportasyon nangruna iti agtultuloy a panagbalbaliw ti presyo ti produkto ti petrolyo.
Sigun kenkuana, maawatanna met ti agdama a transition period a mang-apapketara iti presyo ti petrolyo ngem mamati daytoy a saan pay a napapanawen ti panagngato ti presyo ti petrolyo.
Imbinglayna pay a sumagmamano ita dagiti drivers ken operators ti saanen nga agpaspasada gapu iti kinangato ti presyo ti pretrolyo nangruna dagiti adda iti boundary system.
Gapu iti daytoy, namnamaenda a maipaayan iti naan-anay a konsiderasyon ken maiparbeng a desisyon dagiti sumaruno nga pakdaar dagitoy tapnu maliklikan ti nakaru nga epekto iti sektor.
Mangnamnamada pay nga adalen ti sumaruno nga administrasyon ti implementasyon ti modernization program kadagiti parapubliko a lugan iti pagilian.
Sigun pay kenni Evangelista, adu pay dagiti saan nga sumuporta iti nasao nga programa.
Kinunana nga nasken nga adalen pay ti gobierno ti epekto daytoy nangruna kadagiti babassit nga operators ken drivers.
Kagiddan iti dayta, mangnamnama met dagitoy a tungpalen pay ti gobierno ti panakaipaay ti sumaruno nga subsidiya kadagiti drivers ken operators nga apektado ti panagngato ti presyo ti petrolyo ken ti agtultuloy a pandemya.
Inayonna a dakkel a katulungan kadagiti drivers ken operators ti subsidiya a maaw-awat dagitoy nangruna iti agtultuloy a pademya.
