BAGUIO CITY – Pangpanggepen ti lokal a gobyerno iti siudad ti Baguio a mangbirok kadagiti mabalin a mangipaay ti suporta wenno pondo a maaramat para iti feeding program dagiti ubbing a saan a nairaman iti pondo nga inlatang ti Department of Education.
Sigun kenni Atty. Betty Lourdes Tabanda, limitado laeng ti nailatang a pondo kadagiti pagadalan nga addaan ti nangato a kaso ti malnutrition.
Nupay kasta, agparparang nga adu latta dagiti estudyante a malnourished kadagiti daduma pay a pagadalan rason a masapol ti kanayonan pay a pondo.
Naduktalan pay a kaadwan kadagiti karaman iti malnutrition ket dagiti estudyante iti Grade 7 agingga Grade 12 a saanen a saksaklawen iti nasao a programa nu sadino ti agparparang a rason ket ti saandan a panagbalon ti taraon, ken ti panangaramatda kadagiti monetary allowancesda kadagiti sabali a banag kas iti load, pang-gimik wenno panggatang ti vape.
Kabayatanna, kinuna ni Atty. Tabanda a masapol a 120 nga aldaw ti kapaot ti feeding kadagiti ubbing sakbay a makita ti resulta daytoy, ken saan a posible ti makabulan wenno maysa laeng nga ladaw.//Bombo Rob Dominguez
