BAGUIO CITY – Maaw-awis dagiti kwalipikado a pamilya ditoy Baguio City iti panakipasetda iti survival garden contest nga addaan ti dua a kategorya.
Sigun kenni Dr. Brigit Piok, dadaulo ti City Veterinary and Agriculture Office, umuna a kategorya ti in-ground garden plots ken maikadua ti container garden.
Maipasidong dagiti partisipantes iti screening iti barangay level ken mabigbig dagiti tallo a mangabak iti tunggal kategorya.
Ibagi met ti kampeon iti tunggal kategorya ti barangay dagitoy para iti maikadua nga screening inton June 25-26.
Kinuna ni Dr. Piok a kasapulan laeng nga agaramid iti pammaneknek dagiti partisipante kas iti detalyado nga scrap book a naglaon iti dua a bulan a panangtaripatoda iti survival garden, pakairamanan dagiti ladawan dagiti mula manipud iti bukel agingga idi dimmakkel dagitoy.
Nasken metlaeg a mailanad iti scrap book dagiti impormasyon iti aldaw ti panaka-aramid ti survival garden, kaado ti apit ken mula, lokasyon ti garden ken dadduma pay.
Maisumitir ti nasao nga scrap book agingga inton June 11 para iti barangay level.
Innayon ni Dr. Piok a makaawat dagiti mangabak iti barangay level iti insentibo kas iti agricultural inputs/tools bayat a dagiti mangabak iti city-wide level ket makaawat ti kwarta ken vouchers malaksid iti panagbalin a proponents dagiti agricultural programs tapnu masustinir ti survival garden project.
Nairaman pay ti nasao a pasalip iti panakabigbig ti Best Performing Barangay ti Baguio City.
