BAGUIO CITY– Napadayawan dagiti nangabak iti Survival Garden Contest ti lokal a gobyerno ti Baguio City kabayatan ti flag ceremony idi kalman sadiay City Hall.
Indauluan ni Dr. Brigit Piok, dadaulo ti Baguio City Veterinary Office – Agricultural Division ti panakaipaay iti pammigbig kadagiti nangabak iti dua a kategorya ti nasao a pasalip.
Nagun-od ni Wagner Mat-an manipud iti Bakakeng Central Barangay ti District 14 ti kampeonato iti kategorya nga In-Ground Garden bayat a nagun-od met ni Amelia Montes manipud iti Pinget Barangay ti District 8 ti kampeonato iti kategorya a Container Garden.
Agpada a nakaawat dagitoy iti sag-P8,000.
Nakaawat met iti consolation prizes a P1,500 dagiti sumagmamano a nakipaset iti pasalip kas kada Manuel Rivera Jr. ken Eliza Betlayan iti kategorya ti In-Ground Garden ken ni Amniya Amag iti kategorya a Container Garden.
Naipaayan met iti Certificate of Scholarship ni Margarita Joseph gapu iti kontribusyon daytoy iti Urban Gardening nangruna ita a panawen ti pandemya.
