BAGUIO CITY – Panggep ti Baguio City Veterinary and Agriculture Office a pagbalinen a regular a programa ti urban gardening wenno survival gardens ditoy siudad.
Sigun kenni Dr. Bridgit Piok, dadaulo ti nasao nga opisina, resulta daytoy ti naobserbaranda a kapintas ti partisipasyon nga impakita dagiti umili iti nasao a programa.
Maipalagip nga inyusuatda ti programa a panangiwaras kadagiti bukel tapnu adda ti imula dagiti umili a pagalaanda ti suplay ti taraon, partikular ti nateng kabayatan ti community quarantine gapu iti agdama a COVID-19 pandemic.
Dinakamatna a pinasetan met ti 121 a barangay ti siudad ti pasalip para iti best survival gardens ken adu nga umili ti siudad ti nagnumar iti nasao a programa.
Innayon pay ni Dr. Piok a planoda a mangisayangkat ti panagsanay seknan iti backyard gardening kadagiti masungad a lawas tapnu matulongan dagiti residente a mangrugi ken mangituloy iti survival gardens dagitoy.
