BAGUIO CITY – Dakkel ti panagyaman ti maysa kadagiti nakalugan iti parapashero a van a nagaburan ti bato ken daga iti pananglasatna ken ti pamilyana iti napasamak nga insidente sadiay Camp 1, Tuba, Benguet.
Sigun iti maysa kadagiti nakalasat iti nasao nga aksidente, nakatugaw dagitoy iti likod a paset ti van, kaduana ti pamilyana, idi killaat a naitupak ti bato iti makinsango a paset ti nasao a lugan.
Kinunana a gapu iti daytoy ket kaaduan kadagiti nadangran ket dagiti nakatugaw iti sangwanan, pakairamanan ti pimmusay nga estudyante.
Innayonna a gapu iti panakaklaat dagitoy iti nasao nga insidente ket ti likod a sarming ti van ti kinugtaran dagitoy a nagnaanda a paruar.
Dinakamatna a pinadasna nga ingguyod ti nasao nga estudyante ngem gapu iti panaka-ipit daytoy iti sangwanan ket saanna a nabaelan.
Nagyaman met daytoy iti maysa a babai a driver a nangilugan kadakuada ken nangisabat kadakuada kadagiti ambulansiya a nangipaay iti first aid kadagitoy.
