Balligi nga inarestar ti City Drug Enforcement Unit, Camdas Police Station 2, ken daduma pay a kameng ti pulisya ti maysa a drug suspect sadiay Cresencia Village, Purok 3, Baguio City idi laeng rabii bayat ti naisayangkat a buy-bust operation.
Ti suspect ket agtawen ti tallo pulo(30) ken maysa a construction worker a residente metlaeng iti nadakamat a lugar.
Nakumpiskar manipod iti suspect ti transparent plastic sachet a naglaon ti white crystalline substance a maatap a shabu. Agdagsen daytoy ti maysa a gramo ken aggatad ti mapatta-patta a Php6,800.
Malaksid iti dayta, nakumpiskar metlaeng manipod iti suspect ti maysa a 500 peso bill, innem a pidaso ti Php1000 boodle money nga addaan ti agpapada a serial number, ken maysa nga android phone.
Nupay kasta, nagkedked ti nasao a suspect a saan a daytoy ti agtagikua kadagiti nasao a kagawaan rason a kiniddawna ti fingerprint test kadagitoy, kasta metten ti panakaipasidongna iti drug ken medical test.
Inlawlwagna a saan pay simmango daytoy iti kaso nga adda pakainaiganna iti iligal a droga ngem immunan a simmango iti kaso gapu iti panaglabsing daytoy iti RA 9262 wenno ti Violence Against Women and Their Children.
Kabayatanna, naisayangkat ti inventory kadagiti nakumpiskar a kagawan iti presensya dagiti Barangay Officials ti Cresencia Village, kameng ti media, ken representative ti Department of Justice.
Iti agdama, addan ti suspect iti kustodiya ti pulisya para iti dokumentasyon sakbay a maipaima iti Baguio City Jail nu sadino, sumango daytoy iti kaso a panaglabsing iti RA 9165 wenno ti Comprehensive Dangerous Drugs Act of 2002.//Bombo Jez Lapizar
