BAGUIO CITY – Nabigbigen ti kinasiasino ti suspek a nangbagbagsol iti 18-anyos a babai idiay Purok 21 San Carlos Height, Irisan, Baguio City idi Setyembre 20, 2024.
Immunan a nabigbig ti biktima a ni Kacey Gabriel Alberto Labayen, awanan asawa, taga-Nueva Vizcaya ken agtrabtrabaho kas customer care assistant iti maysa a bar idiay Bokawkan Road, Baguio City.
Iti interview ti Bombo Radyo, kinuna ni PMaj. Harriet Bulcio, Information Officer ti Baguio City Police Office, naduktalanda ti kinasiasino ti agmaymaysa a suspek babaen iti tulong dagiti CCTV camera ken salaysay dagiti testigo.
Nupay kasta, saan pay a dinakamat ni Bulcio ti nagan ti suspek ngem isagsaganadan dagiti ebidensiya para iti pannakatiliw ken pannakaipila ti kaso kontra iti suspek.
Iti agdama ket saan pay a maibaga ti pulisya ti motibo ti suspek iti napasamak a krimen.
Maipalagip nga idi Setyembre 20, 2024 ket nadiskobre ti lamo-lamo ken dara-dara a bangkay ti biktima iti uneg ti boarding housena idiay Irisan, Baguio City.
Nagsagrap ti biktima iti uppat a bagsol iti tengnged ken dua a bagsol iti barukongna.
