BAGUIO CITY – Simmuko ti suspek a nangdanog iti lalaki iti maysa nga overpass ditoy Baguio City a nagresulta tapnu matnag ti biktima iti agdan ken maitama ti ulona iti agdan a nangitunda iti ipupusayna.
Nabigbig ti suspek a ni Marc Manginga Calical, laborer, tubo ti Bauko, Mountain Province.
Immunan a nabigbig ti biktima a ni Colin Chulyao Akingchang, 47-anyos, residente ti Kadaclan Village, Baguio City ken tubo ti Barlig, Mountain Provice.
Sigun kenni Police Major Eddie Bagto, hepe ti Baguio City Police Office – Station 7, boluntaryo a simmuko ni Calical iti istasyonda idi agsapa kalman, July 7.
Maibasar iti naala a video footage ti krimen, parbangon ti July 1 idi pasalog iti agdan iti overpass sadiay Magsaysay Avenue ti biktima idi nasabatna ti suspek.
Nupay kasta, killaat a dinanog ti suspek ti biktima a nagresulta tapnu napadarusdos ti biktima iti agdan agingga a naitama ti ulona iti agdan.
Naitaray pay ti biktima iti pagagasan babaen kadagiti pulis ken ti testigo ngem pimmusay kabayatan ti panakatamingna.
Iti agdama, maur-uray pay ti desisyon ti pamilya ti biktima gaputa itabonda pay ita nga aldaw ti bangkay daytoy.
Ginandat met ti Bombo Radyo News Team a kapatangen ti suspek ngem nagkedked daytoy nga agkomento.
Simmuko ti suspek kalpasan a kinapatang dagitoy ti Bauko PNP ken ni Mayor Abrahan Akilit.
Naamuan a kalpasan ti krimen ket nagawid ti suspek sadiay Bauko.
