BAGUIO CITY – Pimmusayen itay agsapa ti lalaki a suspek iti panangbagsol iti maysa a vegetable disposer sadiay Trading Post, La Trinidad, Benguet idi rabii.
Daytoy ket kalpasan a binugbog daytoy dagiti tattao a nakakita iti panangbagsolna iti biktima a ni Rosorio Mortha Libungan Jr., 39, tubo ti Isabela ken residente iti nasao a lugar.
Segun iti La Trinidad PNP, intaray dagiti concerned citizens ti biktima iti Benguet General Hospital bayat a naglibas ti suspek.
Nupay kasta, kinamat daytoy dagiti bystanders, binugbogda agingga a napukawan iti puot.
Iti met panagresponde dagiti pulis ket intarayda ti suspek iti ospital ngem pimmusay idi agsapa.
Iti agdama ket ur-urayen dagiti pulis dagiti posible a kabagian wenno gagayem ti suspek a mabalin a mangbigbig iti bangkay daytoy.
