BAGUIO CITY–Nakemmegen ti maysa kadagiti kangrunaan a suspek iti napasamak a panagbettak sadiay La Paz, Abra idi Enero 25 a nagresulta iti panakatay ti dua a pulis ken 24 dagiti nadangran pakairamanan da Abra Representative Joseph Sto Niño Bernos ken ti asawana.
Maipalagip a tallo a suspek ti naipilaan iti double murder ken multiple frustrated murder kalpasan ti dua a bulan sipod napasamak ti nasao nga insidente.
Mainaig iti daytoy, balligi a kinemmeg dagiti kameng ti Lagayan MPS ken Abra Provinincial Mobile Force Company ni Joel Millare Balucas, 45 anyos, baro, mannalon ken residente ti Sitio Kiwas, Barangay, Pulot, Lagayan, Abra.
Nakemmeg daytoy babaen iti bileg ti warrant of arrest iti kasona a Double Murder with Multiple Attempted Murder nga impaulog ni Judge Raphiel F Alzate ti RTC branch 1, Bangued, Abra ken awan ti nairekomendar a piyansa.
Naamuan a nakemmeg met laeng ti suspek idi 2017 gapu iti tallo a bilang ti attempted homicide ngem nakapagpiyansa daytoy.
