NUEVA VISCAYA- Boluntario a simmuko kadagiti otoridad ti kangrunaan a suspek iti pannakapapatay ti maysa nga agtutubo a babai sadiay Quezon, Nueva Vizcaya.
Maipalagip a nasaralan ti bangkay ti agtutubo a babai iti bakante a lote idi Pebrero 12, 2026.
Mapapati a nailemmeng ken napuoran ti bangkay ti biktima.
Babaen ti nainget a panagsukimat dagiti otoridad iti CCTV footage, follow-up operations, ken nagtitinnulong nga imbestigasion ti Quezon Police Station ken ti Provincial Intelligence Unit, nabigbig ti maysa a person of interest.
Daytoy ket pakairamanan ni alyas “Ernie,” agtawen ti 33, awanan asawa, tricycle driver, ken residente iti Brgy. Maddiangat, Quezon, Nueva Vizcaya.
Boluntario a simmuko ti suspek idi February 13, 2026 gapu iti umad-adu nga ebidensia kontra kenkuana
Iti agdama, adda iti kustodiya ti Quezon Police Station ti suspek para iti kanayonan a dokumentasion ken imbestigasion.
Kabayatanna, insayangkat ti Nueva Vizcaya Provincial Police Office ti Search Warrant iti lugan a mapapati a naaramat iti nasao a krimen.
Nakumpiskar ditoy dagiti nadumaduma nga ebidensia a maipasidong iti forensic examination.
