BAGUIO CITY–Pimmusay iti maysa a babai kalpasan a giniretan ti saan pay laeng a nabigbig a suspek ti tengged daytoy iti bambantayanna a pawnshop sadiay Abanao Square iti syudad ti Baguio.
Nabigbig ti biktima a ni Lindsay Valdez, sales clerk, 23-anyos, tubo ti Urdaneta, Pangasinan ken residente ti Purok 3, Lower Pinget, Baguio City.
Sigun kenni PSupt. Freddie Lazona manipod iti BCPO, makasuan ti met ti maan-anop a suspek iti robbery with homicide gapu iti panakapapatay ti biktima.
Kinunana a maibasar iti naisayangkat nga inventory, dumanon iti nasurok kagudua a milyon ti gatad dagiti gadget ken cash a tinakaw ti suspek.
Maibasar iti CCTV footage, agdaldalus ti nasao a babae ti sangwanan ti establishimento idi killaat a ginuyud daytoy iti maysa a lalaki pauneg pawnshop kagiddan iti panangtutukna ti kutsilyo iti tengged ti biktima.
Kinunana a nasarakanda ti biktima a nakapakleb iti datar ken nakapungo dagiti ima ken saka na babaen iti packaging tape ken nabusalan pay ti ngiwatna.
Nakita iti CCTV nga alas nuebe syete ti agsapa a rinumwar ti suspek manipod iti nasao nga establishimento ken nagdardaas daytoy a naglugan iti taxi.
Gapu iti daytoy, makikokoordinar ita ti pulisya kadagiti taxi drivers ti syudad para iti posible a panakabigbig ti nasao a suspek. burijit J
