BAGUIO CITY – Sumangsango iti kaso a panagrames ti maysa a garbage collector kalpasan ti maatap a panangramesna iti maysa a balasang sadiay Purok 4, Irisan, Baguio City idi kanikadua.
Nabigbig ti suspek a ni Domingo Lagao, 24, tubo ti La Union ken residente ti Irisan, Baguio City bayat a ti biktima ket agtawen iti duapulo ket innem.
Iti panakiuman ti Bombo Radyo kenni PCI Benedict Gang-aoen, hepe ti Baguio City Police Office Station 9, kinunana nga agur-uray ti biktima iti taxi iti nasao a lugar tapnu agawid idi killaat nga in-guyod ti suspek iti nasamek a paset ti nasao a lugar ken sadiay a maatap a rinamesna ti biktima.
Kinuna ni PCI Gang-aoen a nakita laengen dagiti concerned citizen ti suspek ken kinemmegda daytoy sakbay nga impaimada kadagiti nagresponde a pulis.
Nagyaman met ti opisyal gapu iti tulong dagiti maseknan a residente a nangkemmeg iti nasao a suspek.
Kagiddan iti daytoy ket immapela manen daytoy kadagiti umili nga itultuloyda ti panakitinnulongda kadagiti pulis para iti panakapaksiat ti kriminalidad ditoy lokalidad.
