BAGUIO CITY – Narugianen ita nga aldaw ti swine depopulation wenno panangpatay ken panangikali dagiti baboy nga apektado ti African Swine Fever (ASF) sadiay Malibcong, Abra.
Agleppas iti Martes, April 27 inton sumaruno a lawas ti nasao nga addang kontra iti panagwaras ti ASF.
Maibasar iti listaan ti Malibcong Municipal Agriculture Office, dumanon iti 74 a baboy ti natay manipud iti 287 a pakabuklan a bilang dagiti baboy kadagiti barangay ti Lat-ey, Pacgued ken Gacab.
Naipaka-awat met kadagiti barangay officials ti Malibcong nga amin a taraken a baboy nga adda iti uneg ti 500 meter radius ket mairaman iti depopulation tapno maprebentaran ti panagwaras ti ASF.
Napagnumuan met dagitoy ti panakabukel ti municipal ken barangay ASF task force a mangtutuk iti panakaipatungpal dagiti biosecurity measures tapnu malapdan ti panagwaras ti ASF sadiay.
Naisingasing pay ti panakamulta iti P5,000 dagiti aganup kadagiti alingo kadagiti kabambantayan sadiay ken dagiti agibiahe iti baboy wenno karne ti baboy iti sabali a barangay sadiay Malibcong, Abra.
