BAGUIO CITY – Nakumpsikar dagiti tabako a maibilbilang a kontrabando manipud iti nagduduma a selda iti Baguio City Jail Male Dormitory iti impatungpal ti PDEA-Cordillera nga Oplan Greyhound idi agsapa.
Sigun kenni Jail Warden JCI Crispin Dornagon, naala dagiti nasao a kontrabando iti basuraan, drum ti danum, pungan ken sumagmamano a lugar a saan a makita dagiti jail guards.
Kinunana a nasarakan metlaeng dagiti panid ti Bibliya a naaramat a nangbalkot kadagiti tabako.
Innayonna a maysa a babae ti natiliwan idi kalman a nangisingit iti bulong ti tabako iti pads ti sapatos daytoy.
Dinakamatna nga adda metten dagiti immunan a natiliwan ti kontrabando kas iti shabu, sigarilyo ken tabako.
Impalawag pay ni Dornagon a maipasidong iti disciplinary action dagiti balud a pakakumpiskaran dagiti kontrabando kas iti temporaryo a panakaipawil dagiti bisita daytoy ken panakalimitar dagiti dadduma a maipapaay iti nasao a balud.
Naamuan a regular ti panakaipatungpal ti Oplan Greyhound kadagiti pagbaludan tapnu maipasigurado nga awan dagiti nakastrek kadagitoy a kontrabando.
