Agtaltalinaed a nakarekep iti vehicular traffic ti Tabora Street, Lower Quirino Hill Barangay, Baguio City gapu paylaeng iti nargaay a paset ti kalsada sadiay.
Iti pannakiuman ti Bombo Radyo kenni Barangay Captain Van Dicang iti barangay Lower Quirino Hill, kinunana a nabayag daytoyen a parikutda rason a nangkiddawda iti pundo para iti pannakatarimaan daytoy.
Nupay kasta, maur-uray paylaeng ti P2 million a pundo para iti retaining wall iti nasao a kalsada.
Gapu iti dayta, inremedyo met dagitoy a nangikarga iti trapal idi napalpalabas nga aldaw kas temporaryo a harangna tapno saan a karkaro a bumaba dagiti daga sadiay ngem gapu iti napigsa a panagbayakabak ti tudo nga intunda ti bagyo a Kristine ket kimmarkaro pay a linmukneng daytoy rason a nargaay.
Kinuna kenni Dicang, immunan metlaeng a nagsand bagging dagitoy iti metlaeng nasao a kalsada.
Namnamaenna met a malpas ti bidding iti daytoy tapno marugyanen ti retaining wall para iti seguridad dagiti umili kasta metten ti barangay hall ken dagiti dadduma a babbalay nga asideg iti daytoy.
Innayon pay ti nasao nga opisyal a nagballaag dagitoy iti bumalay iti maysa a pagtaengan sadiay para iti dagus panagbakwitda iti kanito a kumaro ti sasaaden ti nasao a kalsada.
Kabayatanna, kidkiddawenna met kadagiti opisyal iti siudad a naynayonanda pay ti pundo kadagiti babbarangay partikular ti pundo iti emergency response para iti seguridad ti publiko.
