BAGUIO CITY – Nasarakan ti maysa nga ima wenno takiag ti lalaki iti Nangalisan River sadiay Sablan, Benguet idi kalman.
Sigun kenni PInsp. Douglas Akistoy Jr., hepe ti Sablan PNP, dagusda a nagturong iti nasao a karayan, kaduada ti PNP-SOCO, dagiti barangay officials ken dadduma pay nga volunteers apaman a naawatda ti report seknan iti nasao a banag.
Kinunana a nasarakanda ti nasao a paset ti bagi ti tao kalpasan ti panagsawarda iti nasao a disso.
Sigun kenkuana, posible nga ada ti maysa nga indibidual a naiyanod iti nasao nga karayan.
Atapenda pay a naitupak ti nasao nga indibidual kadagiti batbato agingga a nagsisina ti paset ti bagi daytoy.
Innayonna a no ‘clean cut’ ti naputed nga ima ket mabalin a nagtaud daytoy iti ospital ken naibelleng laeng sadiay.
Naiturong metten ti nasao a paset ti ima iti maysa a punerarya para iti panaka-ala ti finger print ken DNA examination.
Agtultuloy met ti panangimbestigar ti Sablan PNP seknan iti nasao a banag.
