BENGUET – Dumanonen iti uppat a disqualification case ti naipila kontra kenni Benguet Congressman-elect Eric Go Yap.
Daytoy ket kalpasan nga impablaak ni Congressman Yap ita a rabii iti social media page daytoy ti kopya ti maikappat a disqualification case kontra kenkuana.
Ti petitioner ket ni Leopoldo Dizon Lamsis, residente ti Daclan, Bokod, Benguet.
Nakalanad iti petisyonna a nilabsing ni Yap ti COMELEC Resolution 11111, Sec. 5 wenno ti saan nga umno a panangipaskil iti campaign materials kadagiti common posting areas.
Nakalanad pay iti petisyon a nilabsing ni Yap ti COMELEC Resolution 11086, Sec. 8 nga adda pakainaiganna iti Fair Election Act ti Republic Act 9006, Sec.13.
Immuna metten nga impila da Melton Ladiocan, residente ti Amgaleyguey, Buguias, Benguet ken Mario Ludaes manipud Mankayan, Benguet ti dua a disqualification case kontra kenni Yap gapu iti mapapati a vote buying ken isyu iti citizenship.
Sakbay daytoy, adda pay ti umuna a petisyon a naipila kontra kenni Yap idi napalabas pay a tawen a mangkukuwestionara iti citizenship daytoy nga isu ti rason iti pannakasuspendir ti proklamasyon ti kongresista idi Mayo 13.
Mainaig iti daytoy, nagkiddaw met iti dispensar kenni Congressman Yap ken kadagiti supporters daytoy dagiti dua nga annak ni Ludaes, maysa kadagiti petitioner, a saanda a sinuportaran ti desisyon ti amada nu di ket bukodna laeng daytoy a desisyon.
Innayonda a saan nga agpada ti kapanunutanda ken ti amada isut gapuna a kiniddawda ti saan a panangbabbabalaw ti publiko iti sibubukkel a pamilyada.
Kabayatanna, inaklon met ni Congressman Yap a posible nga ad-adda pay a maitantan ti pannakaiproklamana kas opisyal a nabotosan a kongresista ti Benguet.
Iti baet daytoy, inkarina a sungbatanna amin dagiti naipila a kaso kontra kenkuana gaputa sigun kenkuana ket kayatna pay nga agserbi iti probinsiya.
