BAGUIO CITY – Binigbigen ti lokal a gobyerno ti Baguio ti tallo a disso iti masakupan ti Burnham Park a posible a pakaibangonan ti paradaan tapnu marisut ti parikut iti kinakurang dagiti paradaan iti nagduduma a paset ti nasao a parke ken iti central business district.
Nailanad iti singasing a Burnham Park Master Development Plan dagiti singasing a parking areas ken dagitoy ket iti maibangon paylaeng a Baguio City Youth Convergence Center, iti baba ti tennis court ken iti asideg ti city creative center malaksid pay iti disso ti daan a city auditorium.
Sigun kenni City Planning and Development Officer Architect Donna Tabangin, babaen kadagiti nasao a parking areas ket maakomodar ti adu a lugan, pakairananan dagiti parapasahero a jeep ken taxi.
Kinunana a makatulong daytoy iti panakaiyurnos ti parikut iti panagparada iti nagduduma a paset ti parke ken maitunos iti pakabuklan a panagdur-as ti nasao a tourist destination.
Iti agdama, ipimpinal ti siudad ti komprehensibo a master development plan para iti Burnham Park a maisumitir iti Tourism Infrastructure and Enterprise Zone Authority kas suporta iti manamnama a panakaipaluspos ti P480-M nga immunan a kiniddaw ti city government para iti panakapasayaat ti sumagmamano a paset ti nalatak a parke.
