![](https://img.bomboradyo.com/baguio/2021/08/bakuna-balud-baguio-PDL.jpg)
BAGUIO CITY – Dumanon iti tallo a district jail iti entero a Cordillera Region ti nakakompleton ti panagbakunada kadagiti balud dagitoy.
Sigun kenni Jail Inspector Erlinda Las-egan, dadaulo ti Community Relations Services Office ti Bureau of Jail Management and Penology-Cordillera, dagitoy ket ti Mountain Province District Jail nga addaan ti 88 a balud, Buguias District Jail nga addaan ti 76 a balod ken ti Luna District Jail nga addaan ti 29 a balod.
Kinunana nga iti datusda ket dumanonen iti 565 a balud iti entero a rehiyon ti balligi a nabakunaan wenno nakaawat ti dua a dose ti bakuna.
Innayonna a maibilang ti Baguio City Jail a nakalpas iti vaccination kadagiti balod gaputa adda ti sag-dua iti Male Dorm ken Female Dorm a saan pay a nakaawat ti bakuna gapu iti medical reasons.
Dinakamatna pay a dumanon iti lima a district jails ti nakapaipaay ti bakuna kontra iti COVID-19 manipod kadagiti 14 a pagbaludan iti rehiyon bayat a dagiti nabatbati ket manarimaan ti panangiprosesoda ken ti koordinasyonda iti maseknan a lokal a gobyerno tapno maipaayanda met ti nasao a bakuna.
Namnamaen pay ni Jail Inspector Las-egan a malpas ti panagbakuna kadagiti balud kontra iti COVID-19 ita a bulan ngem agdependar daytoy iti suplay nga ipaay dagiti maseknan a lokal a gobyerno.