Rumrumwar iti validation ti NCIP Regional Office idi June 23 nga adda ti tallo a “pananaw” dagiti signatories iti petisyon kontra iti Maalinao- Caigutan Biyog Mining Project (MCIB) , maysa a large scale mining company idiay Pasil, Kalinga.
Sigun kenni Atty. Bryan Christopher Donggayao, Acting Regional Legal Office ken Concurrent Legal Officer ti NCIP- Cordillera a dagiti dadduma a claims dagiti petitioners ket saan a nasurot dagiti dadduma a kondisyon wenno dagiti nailanad iti Memorandum of Agreement a pinirmaam dagiti Indigenous People ken ti nasao a mining company.
Malaksid iti dayta, sumagmamano kadagiti signatories ket saan nga umanamong iti iseserrek ti large scale mining gapu ta adda dagiti apektado nga small scale mining iti nasao a lugar.
Ti maudi met ket talaga a saanda nga umanamong iti panagminas.
Sigun kenni Donggayao, kabayatan iti panangiberipikarda iti agarup 240 a signatories iti petisyon, naduktalanda a saan nga amin ket miyembrto ti Balatoc Indigenous Concern Group (BICG).
Innayon ti opisyal a nabukel ti nasao a grupo tapno makaipila dagitoy iti petisyon kaduada ti sektor dagiti agtutubo.
Imbinglay met daytoy a bayat iti validation iti nasao nga isyu, agarup 50 laeng ti nakabael a dimmar-ay.
Nupay kasta, impetteng ni Donggayao a dumalan ti nasao nga isyu iti umno a proseso.
Mainaig iti dayta . .
Kinnidaaw ti Balatoc Indigenous Concern Group (BICG) a makansela ti Certificate of Precondition nga inpaay ti Central Office ti NCIP iti nasao a mining company.
Iti baet dayta, impeksa ni Donggayao a nakikoordinarda metten iti Environmental Management Bureau (EMB) ken dadduma pay a masekna nga ahensya para iti maatap nga environmental degredation a maysa kadagiti immunan nga akusasyon ti nasao a grupo.
Innayon pay daytoy a nu maipapan iti Free Prior Informed Consent (FPIC) process a maatap a saan a nasurot, rumrumuar iti panagadalda nga adda dagiti saan a nakaatendar iti naipatungpal a consultation, rason tapno saanda nga ammo nu inya ti napagtungutngan.
Nupay kasta, kinuna met ti Provincial Office kadakuada, nasurot ti umno a proseso.
Imbutaktak pay ni Atty. Donggayao nga awan ti nakitada a bribery kabayatan iti validation dagitoy.
Nupay kasta, ituloyda latta nga imbestigaran ti nasao nga isyu.
Innayona pay a bayat iti validation dagitoy, naduktalanda nga adda dagiti personal claims ti nasao a grupo no sadino addu dagiti rumrumwa nga isyu pakairamanan dagiti personal a pakaseknanda.
Iti baet dayta, ururayenda laengen dagiti komento ti dadduma pay a maseknan nga ahensya para iti pannakaaramid ti validation report a maisumitir iti Central Office para iti umno nga aksyon dagitoy.
Maipalagip a nangipila dagiti agtutubo ken miyembro ti Balatoc Indigenous Cultural Community iti Pasil, Kalinga ti petisyon dagitoy kontra iti operasyon ti mining company idi Hunyo 10 idiay Regional Office gapu iti maatap a saan a pannakasurot ti FPIC Process, saan nga umno a representasyon ti IPs, environmental degredation ken bribery.
Kabayatanna, iti pannakiuman ti Bombo Newsteam kenni Gary Colao Secretary iti Balato Indigenous Concern Group, mangnamnama daytoy iti mayat a resulta ti validation a naipatungpal.
Pinagyamanan metlaeng daytoy ti Regional Office gapu iti inpatungpalda a validation. // Bombo Noveh Organo
