Nadangran dagiti tallo nga indibidual gapu iti napasamak nga aksidente idiay Tacay Intersection, Pinsao Proper, Baguio City ita laeng a rabii.
Iti interview ti Bombo Radyo kenni Police Major Wiltz Conrad Sally, Station Commander ti Baguio City Police Office-Station 2, napasamak ti aksidente kalpasan a naawanan iti preno ti wing van truck nga imanmaneho ni Arnel Galudang Mateo rason a nasagidna ti maysa a Mitsubishi Montero ken ti maysa pay a toyata Hilux.
Nagsagrap iti minor injury dagiti tallo a pasahero ti Toyata Hilux ngem dagus dagitoy a naiturong dagitoy iti Benguet General Hospital nga iti agdama ket nasaayaten ti kasasaadda.
Saan met a nadangran dagiti tallo a drivers dagiti nadakamat a lugan.
Sigun kenni PMaj. Sally, nagturong met a dagus dagiti otoridad iti nakapasamakan ti aksidente para iti pannakaimanehar ti gunay ti trapiko.
Iti agdama ket manarimaan pailaeng ti imbestigayson dagiti otoridad kagiddan ti panagbirukda iti mangguyod kadagiti nadakamat a lugan.
Iti metlaeng agdama ket mapaspasaran ti nailet a gunay ti trapiko idiay Tacay Intersection, Pinsao Proper, Baguio City rason a nabalakadan dagiti motorista a magnada pailaeng kadagiti alternatibo a ruta.
