Pimmusay ti tallo a suldado ti Israel kalpasan ti napasamak a panangipatayab ti rocket a kukua ti Hamas iti makin-abagatan ti Gaza Strip idiay Gaza nu sadinno, kinuna ti health officials nga agarup sangapulo ket siam nga indibidual ti pimmusay gapu iti panag-atake ti Israel idi Domingo.
Kinuna ti Hamas a responsibilidadda ti panagraut iti Kerem Shalom a nakatayan ti tallo a suldado ti Israel.
Sigun ti militar ti Israel, sangapulo a “rocket” ti naipatayab manipod Rafah iti abagatan a Gaza nga agturong iti lugar ti Kerem Shalom crossing nga iti agdama, naiserra.
Kinumpirmar met daytoy ti Hamas a nangipatayabda ti “rocket” iti Israeli army base ngem pinasingkedanda a saanda a sigurado nu sadinno ti nangipatayabanda a disso.
Ngem inlawlawag ti Hamas a saanda a puntiria ti “commercial crossing”.
Maibasar iti report dagiti otoridad, minilmilyon a Palestinian ti agkamkamamang idiay Rafah, asideg ti beddeng ti Egypt.
Kalpasan ti panag-atake ti Hamas, dagos a nangipatungpal ti “airstrike” ti Israel iti balay idiay Rafah a nakatayan ti tallo nga indibdiual ken pannakadangran ti adu nga sumagmamano nga indibidual.
Kinumpirmar dagiti suldado ti Israel ti “counter-strike” nu sadinno, nadadael dagiti “launcher” ken military structure” sadiay.
Pinaglibakan met ti Hamas nga us-usarenda dagiti sibilian kas “human shields”.
Maipalagip a nangrugi ti gubat kalpasan a kellaat a dimmarup ti Hamas idiay Israel idi Oktubre a siete nu sadinno pimmusay ti 1,200 ken nakawtibo ti 252 nga indibidual.
Iti panangibales met ti Israel, napapatay ti nasurok 34,600 a Palestinians, dua pulo ket siam ti napapatay iti napalabas a duapulo ket uppat nga oras ken nasurok pito pulo ket pito ti nadangran kas maibasar iti datos ti Gaza health ministry.
