BAGUIO CITY – Simmuko iti tropa ti gobyerno ti tallo a supporters ti rebelde a grupo sadiay Pasil ken Lubuagan iti probinsia ti Kalinga idi kalman.
Naamuan a dua kadagiti simmuko ket saan a karaman iti watchlist ti gobyerno kadagiti threat groups ken dagitoy ket militia ng bayan wenno supporters dagiti rebelde iti sidong ti Kilusang Larangan Guerilla (KLG)-Baggas.
Nadutukan dagiti dua a mangited ti impormasyon kadagiti New People’s Army mainaig iti garaw ti tropa ti gobyerno iti lugar dagitoy malaksid pay a nagserbida nga espiya, taga-kolektar ti taraon manipud iti komunidad ken taga-tulod ti mensahe kadagiti dadduma a rebelde.
Kabayatanna, simmuko met ti maysa a supporter ti Lejo Cawilan Command ti KLG-Baggas no sadino, daytoy ket karaman iti watchlist ti gobyerno kadagiti threat groups.
Naamuan a ti surrenderee ket aktibo a miembro ti Indigenous Farmers Association of Guinaang Pasil Incorporated a maysa a civic organization sadiay Kalinga idi pay 2014.
Simmuko dagitoy kalpasan a naawisda gapu iti kinapinget ti tropa ti gobyerno a mangallukoy kadagiti rebelde ken kadagiti mangsupsuportar iti rebelde a grupo a sumuko wenno agsubli iti sidong ti gobyerno, malaksid pay iti kiddaw ti mismo a pamilyada ken ti komunidad.
Maipaspasidongen dagiti tallo iti dokumentasyon ken tactical interview kas paset ti panakaiproseso dagitoy para iti in-inot a panakaisublida iti komunidad.
