BOKOD, BENGUET – Natiliw dagiti tallo a suspek a karaman iti kidnap for ransom bayat a naispal met dagiti dua a biktima iti checkpoint operation a naipatungpal iti Benguet-Nueva Vizcaya Road idiay Gurel, Poblacion, Bokod, Benguet idi malem ti Enero 22.
Iti interview ti Bombo Radyo, kinuna ni PCapt. Gilbert Anselmo, Acting Chief of Police ti Bokod Municipal Police Station, manarimaan ti Comelec checkpoint dagitoy idi nakaawatda ti impormasyon maipapan iti maatap nga insidente ti kidnapping.
Bayat ti operasyon, nakita dagiti otoridad ti lugan a nag-match iti description a naiyawag kadakuada rason a sinukimatda daytoy ken ditoy a nakitada dagiti tallo a suspek ken dagiti dua a biktima a maatap a nakidnap.
Saan met a dinakamat dagiti otoridad ti pakabigbigan dagiti tallo a suspek ngem dua kadagitoy ket residente ti Tinoc, Ifugao bayat a ti maysa ket taga-Kayapa, Nueva Vizcaya.
Dagiti met biktima ket maysa a negosyante, 59-anyos ken caretaker, 55-anyos manipud Pangasinan.
Mainaig iti daytoy, kinuna ni PCapt. Anselmo nga adda pay ti kadwa dagiti tallo a suspek a pakairamanan ti AWOL a pulis a saanda a natiliw.
Gapu iti daytoy, nakikoordinar ti Bokod Municipal Police Station iti Nueva Vizcaya Police Provincial Office ken iti Anti-Kidnapping Group (AKG) a nangitunda iti pannakatiliw dagiti dua pay a suspek idiay Bayombong, Nueva Vizcaya.
Iti agdama ket natalged met ti kasasaad dagiti biktima bayat a sumangsango dagiti suspek iti Alleged Kidnap for Ransom, Violation of Omnibus Election Code ( Comelec Gunban) ken dadduma pay.
