BAGUIO CITY – Nakemmeg ti tallo a wanted persons, pakairamanan ti dua a naibilang kadagiti Top Most Wanted Persons ti siudad ti Baguio iti nagsisina nga operasyon dagiti otoridad ditoy lokalidad idi kalman.
Nakemmeg ti Top 5 Most Wanted Person ti Baguio City Police Office iti maikatlo a kwarter ti 2020 sadiay Ambiong, Baguio City babaen iti warrant of arrest nga inserbi dagiti otoridad idi kalman.
Nabigbig daytoy a ni Mark Anthony Japson Lacuesta, 33-anyos, residente ti nasao a lugar.
Nakemmeg daytoy gapu iti kasona a panagtakaw ken naituding nga agpiyansa iti pakabuklan a P112,000 para iti temeporaryo a panakawaya-wayana.
Kabayatana, nabigbig ti karaman iti Top 10 a Top Most Wanted Person iti City Level ti maikatlo a kwarter ti 2020 a nakemmeg sadiay Irisan, Baguio City a ni Romeo Nisperos alyas John King, 47-anyos, mannalon ken residente ti Bagulin, La Union.
Nakemmeg ti nasao nga indibidual gapu iti kasona a panagrames ken naituding nga agpiyansa iti P200,000 para iti temporaryo a panakawaya-waya daytoy.
Nabigbig met ti maikatlo a wanted person a ni Brian Christian Ravanzo Vinlua, 27-anyos, baro, construction worker ken residente ti Marcos Highway.
Nakemmeg daytoy gapu iti kasona a panagtakaw ken narekomendaran iti P24,000 a piyansa para iti temporaryo a panakawayawayana.
