BAGUIO CITY – Nailista ti Rehion Cordillera ti tallo kadagiti 18 a kanayonan a kaso ti UK variant ti COVID-19 ditoy pagilian.
Maibasar iti report ti Department of Health, dagitoy ket dua a menor de edad a lallaki ken maysa a 41-anyos a babai.
Naduktalan a konektado dagiti dua a menor de edad iti immuna a 12-anyos a karaman iti orihinal a cluster ti UK variant cases sadiay Samoki, Bontoc, Mountain Province.
Naamuan met a ti 41-anyos a babai ket konektado iti kaunaan a cluster ti UK variant cases sadiay La Trinidad, Benguet.
Naimbagan metten dagiti tallo manipud iti COVID-19 ken nakompleton ti contact tracing kadagiti indibidual a direkta a nakapulapolda.
Iti agdama, dumanonen iti 21 ti kaso ti UK variant ti COVID-19 ditoy rehion Cordillera a bukbuklen ti 20 a naimbagan ken maysa a pimmusay.
