LA TRINIDAD, BENGUET – Impeksa ni Benguet Congressman-elect Eric Go Yap iti social media page daytoy nga iti agdama ket adda ti tallo nga affidavit a naawat ti opisinana a mangibabbabawi iti impilada a kaso kontra kenkuana.
Sigun kenni Yap, ipaayanda iti gundaway agingga inton Hunyo 15, 2025 dagiti nabatbati nga indibidual a nangipila iti kaso kontra kenkuana nangruna dagiti napilitan ken dagiti saanna nga ammo ti kaipapananan ti pinirmaanna nga isanodda ti kaso nga impilada.
Inlawlawag ti kongresista a saanna a butbutngen dagiti nangipila iti kaso nu di ket kayatna laeng nga ipaayan iti gundaway dagitoy tapno mailiklikda iti aniaman a kaso a mabalin a sangoenda.
Dinakamatna a mangipila ti kampona iti kaso a perjury kadagiti petitioners kasta metten dagiti mapapati nga adda iti likodan ti nagsasaruno a disqualification case.
Maibasar iti linteg ti Pilipinas, ti kababaan a sentensiya ti maysa a tao nu makumbiktar iti kaso a perjury ket maibalud iti innem a tawen ken maysa a bulan.
Kagiddan daytoy, immapela ni Yap kadagiti umili ti Benguet a liklikandan ti makiapa iti social media gapu ta nalpasen ti eleksyon.
Iti sabali a bangir, pinadas met ti Bombo Radyo Baguio nga alaen ti benneg dagiti indibidual a nangipila iti disqualification case kontra iti kongresista ti Benguet ngem saan dagitoy a nangipaay iti sungbat.
Nupay kasta, agtaltalinaed latta a nakalukat ti istasyon ti Bombo Radyo kadagiti kayatna a mangipaay iti dasigna maipapan iti nasao nga isyu.
