TABUK CITY, KALINGA – Pimmusay ti tallo nga indibidual iti napasamak a pammaltog idiay Tabuk City, Kalinga itay agsapa, Abril 24.
Nabigbig dagitoy a da Santos Calsiyao, Tokar Calsiyao ken Leo Palat Calsiyao, 30-anyos, bin-ig a residente ti Basao Dilag, Tabuk City, Kalinga.
Maibasar iti inisyal a report ti Tabuk City Police Station, adda ti naawatda nga awag itay alas siete ti agsapa maipapan iti insidente ti pammaltog.
Dagus met a nirespondeanda ti insidente nu sadino nasangpetanda iti kalsada ti bagi dagiti tallo a biktima nga awanan biag.
Nakitada pay iti nakapasamakan ti insidente ti dua nga M16 rifle ken maysa a shotgun.
Naduktalan iti inisyal nga imbestigasyon nga adda ti nakapinnaltog dagiti biktima iti asideg ti pagtaengan ti maysa a barangay kagawad.
Iti agdama ket manarimaan ti imbestigasyon dagiti otoridad tapno mabigbig ti kinasiasino dagiti suspek ken ti motibo dagitoy.
