ITOGON, BENGUET – Pimmusay ti tallo nga indibidual bayat a nadangran ti maysa pay kalpasan ti aksidente idiay Camanggaan First Gate, Brgy. Ucab, Itogon, Benguet pasado alas sais itay laeng agsapa.
Nabigbig dagiti pimmusay a da Jefferson Amayag Oplas, 29-anyos, driver; Rubelyn O. Agapinan, 27-anyos ken Charles Oplas, 21-anyos, agpada a pasahero.
Agpapaagas met ita iti ospital ti maysa a pay a pasahero a ni Luisito David Bacoco, 14-anyos.
Dagiti biktima ket bin-ig a residente ti Luneta, Antamok, Barangay Loacan, Itogon, Benguet.
Iti inisyal nga imbestigasyon ti Itogon MPS, nagtaud ti Toyota Hilux Conquest idiay First Gate, Ucab ken paturong iti siudad ti Baguio idi killaat a naibangga iti road concrete barrier rason a natnag dagitoy iti rangkis nga addaan iti kauneg a 100 meters.
Naideklara a dead on the spot ni Charles Oplas bayat a naitaray iti ospital da Jefferson Oplas, Rubelyn Agapinan ken Luisito David Bacoco.
Nupay kasta, naideklara a pimmusay metlaeng da Jefferson ken Rubelyn bayat ti pannakatamingda iti ospital.
Manarimaan ita ti imbestigasyon dagiti otoridad maipapan iti rason ti nasao nga aksidente ngem nailista daytoy a maysa a kaso ti Reckless Imprudence resulting in Homicide and Multiple Physical Injuries with Damage to Property
