Pimmusay ti tallo nga Israeli gapu kadagiti “gunmen” ken nadangran ti walo pay a sabali iti kaudian a napasamak a kinaranggas idiay West Bank.
Naipadamag ti adu a panagatake ken panagraut dagiti Israeli settler kontra kadagiti Palestinians idi laeng kalman iti nasao a lugar.
Ti nagadu a panangraut dagiti Israeli settlers kadagiti komunidad ti Palestinian ket pinatured ti opensiba ti pagilianda idiay Gaza ken suporta manipud iti makannawan a gobierno ti Israel.
Itay laeng nabiit, napuntiria ti lugan dagiti Israeli a paturong iti Al-Funduq, maysa a Palestinian village idiay West Bank, sigun kadagiti Israeli authority.
Dua a babbai iti maysa lugan ti napalpaltugan ken maysa a lalaki iti maikadua a lugan ti pimmusay gapu iti panangpalpaltog.
Nabigbig dagiti babbai nga umuli iti Kedumim iti northern West Bank bayat a ti lalaki ket agnanaed iti northern Israel ken mangmangged kas police investigator idiay West Bank.
Kabayatanna, nadangran ti walo a tattao iti panagatake pakairamanan ti maysa a bus driver a napalpaltugan iti tian ken sakana.
Gapu iti dayta, dagos a naibilin ti pannakaideploy ti kanayunan nga Israeli military iti nasao a lugar, ken kanayunan a checkpoints, ken pannakaiserra iti dalan kadagiti kalkalsada sadiay.
