Kinumpirmar ti Department of Migrant Workers nga adda ti tallo nga Overseas Filipino Workers (OFW) a pimmusay idiay United Arab Emirates kagiddan ti napasaran a napigsa a panagtudo ken nakaro a panaglayos iti nasao a pagilian idi Abril 16.
Sigun kenni Department of Migrant Workers Officer-in-Charge Hans Leo Cacdac, dua kadagiti OFW ti pimmusay gapu iti suffocation iti uneg ti luganda bayat a ti maysa ket pimmusay gapu iti vehicular accident.
Impasigurado met ni Cacdac a mangipaay ti gobierno ti Pilipinas ti suporta ken tulong kadagiti pamilya dagiti pimmusay.
Kabayatanna, manarimaan ti panangkumpirmar dagiti otoridad nu pudno nga adda ti dua nga Overseas Filipino Workers a pimmusay iti nasao metlaeng a pagilian kalpasan a maatap a nakuryente dagitoy kagiddan metlaeng ti napasaran a napigsa a panagtudo ken nakaro a panaglayos iti nasao a pagilian.
Immunan a kinuna ni Bombo International News Correspondent Jessa Roces manipud Dubai nga adda ti naipadamag kadakuada a dua nga overseas filipino workers idiay United Arab Emirates a pimmusay kalpasan a nakuryente dagitoy bayat ti nasao a kalamidad.
Mainaig iti dayta, sumagmamano metten nga Overseas Filipino Workers idiay Dubai ti nagsubli iti trabahoda ken naglukat metten dagiti sumagmamano a negosyo ken malls.
Nupay kasta, agtaltalinaed latta a nakarikep dagiti airports ken adda pay dagiti paset ti Dubai a saan a mapagna rason nga awan pay ti agbiahe a public ken private vehicles.
Iti baet dayta, ar-aramiden met dagiti maseknan nga otoridad ti kabaelanda tapno madalusan dagiti nadadael gapu paylaeng iti napasamak a panaglayos.//Bombo Rosemarie Bulsao
