BAGUIO CITY- Nainget ita ti panagsagana ti tallo a pagadalan ditoy Cordillera para iti pannakipasetda iti Programme for International Student Assessment (PISA) 2022.
Karaman kadagiti napili a pagadalan ti Sagpat Integrated School sadiay Kibungan,Benguet para iti small category; Apayao National Agricultural High School sadiay Calanasan, Apayao para iti big category ken St. Louis Center, Incorporated iti sidong ti private schools .
Agtawen met iti 15 dagiti learners wenno estudyante a makipaset iti nasao nga assessment nu sadinno 27 nga learners ti manipod iti Kibungan IS; 42 iti Apayao National Agricultural High School ken 40 a learners manipod iti St. Louis Center, Incorporated.
Agtultuloy met ti monitoring ti DepEd Cordillera kadagiti nadakamat a pagadalan tapnu masigurado ti kinasagana dagiti learners malaksid iti physical structure, learning, ken assessment paraphernalia a kasapulan ti pagadalan.
Babaen met iti pannakaipatungpal ti PISA ket marukod ti laing dagiti estudyante iti tay-ak ti mathematics, science ken Reading comprehension.
Maipalagip nga iti panagbisita ni Deped Secretary Leonor Briones iti Deped-Baguio ken Benguet itay nabiit ket dinayaw ken impannakelna ti Baguio City National High School a nakagun -od ti nangato a rating iti reading comprehension iti naangay a PISA 2018 nu pay iti pakabuklan ket ada iti kababaan a ranggo iti Pilipinas manipod kadagiti amin pagilian a nakipaset iti daytoy.
Kinunana met ni Briones a nagdesision latta daytoy a makisalip manen ti Pilipinas iti PISA ita a tawen nupay posible a saan unay a nangato ti maala nga score gaputa mausar daytoy kas pagbasaran tapnu ad-ada pay a mapapintas ti edukasion iti pagilian.
