BAGUIO CITY – Saan pailaeng a narambakan ti Paskua ket nakailistan ti Baguio City iti tallo a kaso ti firecracker- related injuries manipud Disyembre 22 agingga Disyembre 23.
Iti interview ti Bombo Radyo, kinuna ni Dra. Celia Flor Brillantes, dadaulo ti City Health Services Offices, adda ti tallo nga ubbing a nadangran gapu iti paputok.
Dinakamatna a dagiti biktima ket dua a lalaki nga agtawen iti 14 ken 10 ken maysa a babai nga agtawen iti 9.
Sigun kenni Dra. Brillantes, ti 14-anyos ket nagsagrap iti sugat iti matana bayat a ti 9-anyos ket nagsagrap iti sugat iti kannawan a ramayna kalpasan a nagaramat dagitoy five-star.
Ti met 10-anyos nga ubbing ket nagsagrap iti nagduduma a sugat iti paset ti bagina kalpasan a natamaan iti boga nga ay-ayamen dagiti kakadwana.
Maibasar iti monitoring, napaawid dagiti biktima ken saanda a naadmitar iti ospital kalpasan a naipaayanda iti umno a first-aid.
Gapu iti daytoy, nagpalagip manen ni Dra. Brillantes a liklikan ti panaglako iti paputok tapno maliklikan ti kapada nga insidente.
Impalagipna metlaeng kadagiti nagannak a bantayanda dagiti annakda tapno saanda nga agay-ayam iti paputok.
Mainaig iti daytoy, inyunay-unay ni Dra. Brillantes a nu matamaan iti paputok ket nasken nga ugasan iti danum ken sabon ti sugat ken agturong a dagus iti ospital tapno maipaayan iti anti-biotics, pain reliever ken anti-tetanus.
