Adalen iti Palasyo Malacañang nu mabalin a maipilaan iti kaso a sedition wenno treason dagiti indibidwal nga adda iti likudan iti maatap a coup d’etat — tignay a mangibabawi koma iti suporta ti militar iti Plipinas iti agdama nga administrasyon.
Sigun kenni Palace Press Officer Atty. Claire Castro, naipakaammon iti presidente ti napanggep a tignay dagiti grupo ti indibidwal a pakairamanan dagiti retirado a kameng iti militar.
Nupay kasta, kinuna ni Atty. Castro nga awan ti rumbeng a pagdanagan dagiti umili seknan iti destabilization attempts gapu ta kumpiansa latta ni President Ferdinand Marcos Jr. ken saan a madanagan iti nasao a panggep.
Agpada metten nga impatalged da Armed Forces of the Philippines Chief of Staff General Romeo Brawner Jr. ken Acting Philippine National Police chief General Jose Melencio Nartatez Jr. ti loyalty dagitoy iti Constitution ken iti chain of command.
