BAGUIO CITY – Nakemmeg ti maysa a high value individual ken sigud a drug surrenderee iti buy-bust operation nga insayangkat dagiti otoridad iti maysa a gas station sadiay Cresencia Village, Baguio City idi kanikadua.
Nabigbig daytoy a ni Roger Neri Montevergin, 49-anyos, taxi driver, tubo iti Santa Cruz, Zambales ken residente ti Piripin Bato, Pico, La Trinidad, Benguet.
Nakumpiskar kenkuana ti tallo a pakete ti maatap a shabu nga agdagsen ti agarup nasurok tallo a gramo nga aggatad ti P20,400.
Nakumpiskar pay kenkuana ti naaramat a buy-bust money, ti cellphone ken motorsiklo nga inaramatna iti transaksion.
Maibasar iti rekord ti pulisya, ni Montevirgen ket High Value Individual ken sigud a drug surrenderee ti La Trinidad Municipal Police Station.
Iti agdama, sumangsango ti nasao a drug personality iti kaso a panaglabsing iti RA 9165 wenno ti Comprehensive Dangerous Drugs Act of 2002.
