BAGUIO CITY – Natiliw ti maysa a taxi driver gapu iti panangramramesna iti bukodna nga anak a babai.
Maibasar iti report ti Baguio City Police Office, ti suspek ket nakalista kas numero uno a top most wanted person ti siudad ti Baguio.
Natiliw daytoy iti pagtaenganna sadiay Santo Tomas, Baguio City idi kanikadua.
Sigun kenni Police Staff Sergeant Mira Buabo, Investigator-On-Case, personal nga inreport ti biktima ti namin adu a panangmolestia ti amana kenkuana manipud idi agtawen ti innem agingga iti naudi nga insidente idi napalabas a bulan ti Setyembre.
Dinayaw met ni BCPO director Police Colonel Allen Rae Co ti panakakemmeg ti suspek kagiddan ti panangkunana a timely daytoy gaputa maramrambakan ita a bulan ti National Children’s Month.
Kagiddan iti daytoy ket inyapelana ti panagkaykaysa ti amin tapnu maital-o ken masalwadan dagiti karbengan dagiti ubbing.
