![](https://img.bomboradyo.com/baguio/2019/05/POLICE-REPORT.jpg)
BAGUIO CITY – Dukduktalen ita dagiti pulis ti pakabigbigan dagiti suspek a nang-hold up ken nangpaltog iti maysa a taxi driver sadiay Suello Village ditoy siudad ti Baguio City iti pasado alas dose idi parbangon.
Nabigbig ti biktima a ni Benny Milo Saguid, 54-anyos, naasawaan, taxi driver ken residente ti Loakan, Itogon, Benguet.
Maibasar iti imbestigasyon dagiti pulis, naka-awat iti tawag ti biktima manipud iti maysa a kadwana seknan iti panangsukonna iti dua a lallaki a pasahero sadiay Lakandula Street.
Sinukon ti biktima dagiti dua a pasahero a nagpaitulod sadiay Asin Road.
Imbaga dagiti dua a magnada iti Marcos Highway tapnu apanda pay sukunen ti kadwada a babai sadiay Suello Village.
Nupay kasta, apaman a nakadtengda iti nasao a lugar ket pinasardeng dagiti dua a pasahero ti taxi sakbay ti panangtutok ti nakatugaw iti backseat iti paltog iti ulo ti driver ken iti panangideklarada iti ‘hold-up’.
Ginandat ti driver a luktan ti ridaw iti abayna ngem imputok ti suspek ti iggemna a paltog a nagresulta tapnu matamaan ti kanawan nga abaga ti biktima bayat a naidungpar ti taxi iti sidewalk.
Kalpasanna, tinawagan ti biktima ti kadwana a nangirekomenda kadagiti suspek tapnu ibaga ti napasamak sakbay a tinawaganna ti asawan a nagpatulong met kadagiti pulis.
Dagus a nagresponde dagiti pulis kalpasan a naawatda ti impormasyon ken inturongda ti biktima iti pagagsan.
Sigun iti biktima, agpada a naka-kallugong dagiti suspek ken ti maysa ket naka-maong jacket bayat a ti maysa ket naka-brown sweatshirt. (-with Bombo Nikki Agsiweng)