BAGUIO CITY – Agtultuloy ti imbestigasion nga ipatpatungpal dagiti kameng ti Baguio City Police Office iti kaso ti pammaltog itay parbangon sadiay Slaughter House, Sto Nino, Baguio City.
Nabigbig ti biktima a ni Rene Fermin Sab-it, agtawen iti 30, naasawaan, taxi driver ken agnanaed sadiay Samuyao, Itogon, Benguet bayat a saan pay a nabigbig ti suspek.
Maibasar iti report, nadungpar ti suspek ti taxi ti biktima a nakaparada iti igid ti kalsada a nangitunda iti panagsinnubang ti suspek ken biktima.
Kalpasanna ket nangala ti suspek iti paltog iti uneg ti lugan daytoy ket pinaltuganna ti biktima.
Napuntaan ti kannawan a luppo ti biktima ken iti agdama ket matamtaming daytoy iti pagagasan.
Suksukimaten dagiti otoridad dagiti CCTV camera a nakamuntar iti nakapasamakan ti aksidente para iti pakabigbigan ti suspek.
