BAGUIO CITY – Pimmusay ti maysa a taxi driver kalpasan a pinalpaltogan ti saan pay a nabigbig a suspek sadiay Kias, Baguio City idi rabii.
Nabigbig daytoy a ni Johnherr Danang Omli, 50-anyos ken residente ti Kias, Baguio City.
Sigun iti pulisya, imanmaneho ti testigo a ni Julius Wakit ti parapasahero a jeep-na iti deppaar ti Aguinaldo Drive sadiay Barangay Kias idi nakitana ti nabuntog a panagtaray ti taxi nga imanmaneho ti biktima a paturong iti sentro ti siudad.
Nagdesisyon ti testigo nga ag-overtake ngem idi nalabasannan ti nasao a taxi ket nakitana ti biktima nga awanan puot ken nakayuko iti ayan ti driver’s seat bayat ti nabuntog a panataray ti taxi.
Nakita pay ni Wakit a dara-dara ti biktima a ni Omli isut gapuna a dagus nga insardeng ken impa-igidna ti jeep-na tapnu tulonganna ti biktma.
Sinublat ni Wakit ti biktima iti manibela ti taxi ken intarayna daytoy iti Baguio General Hospital and Medical Center.
Nupay kasta, naideklara a pimmusay ti biktima kabayatan ti panakataming daytoy.
Naamuan a nagsagrap ni Omli iti dua a tama ti bala ti paltog iti barukong ken maysa pay iti kanawan a takiag.
Manarimaan met ita ti imbestigasyon dagiti pulis tapnu mabigbig ti suspek ken ti motibo iti krimen nangruna ta awan ti napukaw iti kagawaan ken iti koleksiyon ti biktima.