BAGUIO CITY – Pimmusay ti maysa a taxi driver kalpasan a minartilyo ti pasaherona ti ulona sadiay St. Bernadette, Dominican Extension, Baguio City idi kalman.
Nabigbig ti biktima a ni Erwin Cueno, baro, tubo ti Naguey Atok, Benguet ken residente ti Puguis, La Trinidad, Benguet.
Nabigbig met ti nakemmeg suspek a pasahero daytoy a ni Zaldy Matalang Cuycuydo, 18-anyos, construction worker ken residente ti Bakakeng Central, Baguio City.
Sigun kenni PCI Eddie Bagto, dadaulo ti Baguio City Police Office – Station 1, nakaawatda ti tawag manipod kadagiti residente iti nasao a lugar seknan iti insidente isut gapuna a dagusda a nagresponde.
Kinuana a nadanunanda ti pimmusay a biktima ken narekoberda ti martilyo nga inaramat ti suspek a nangmartilyo iti ulo ti biktima a nangitunda iti dagus nga ipupusay daytoy.
Kinunana a posible a hold-up ti motibo ti suspek ngem saan a naituloy ti suspek gapu kadagiti residente a dagus a nang-arayat iti biktima.
Inaklon metlaeng ti suspek nga inaramidna ti nasao a krimen kalpasan a nabartek ken naabak daytoy iti sugal ken awan ti kuarta nga ipaayna iti pamilyana.
Gapu iti daytoy, ginandatna a takawan ti driver ti taxi a naglugananna.
Naamuan a pimmusay ti biktima gapu iti nakaro a dunor iti ulo daytoy.
Naituding a maiyawid ti bangkay ti biktima sadiay Atok, Benguet.
