BAGUIO CITY – Hustisya ti kidkiddawen ti pamilya ti taxi driver a napapatay idi rabii sadiay Magsaysay Avenue, partikular iti deppaar ti Slaughter House Compound, siudad ti Baguio.
Immuna iti daytoy, pimmusay ti biktima a ni Dexon Alos, 36-anyos, naasawaan, tubo ti Kabayan Benguet ken residente iti Km. 3, La Trinidad, Benguet kalpasan a pinalpaltogan daytoy ti saan pay a nabigbig a suspek a nakalugan iti motorsiklo.
Iti panakiyuman ti Bombo Radyo kenni Clarine Alos Wagang, kabsat ti biktima, naamuan a napan nangan ti biktima ken ti kabsatda a maysa metlaeng a taxi driver sadiay Slaughter House ngem naun-una a pimmanaw ti inaudi a kabsatda tapnu aggarahe daytoy.
Maibasar met iti salaysalay dagiti tattao a nakakita iti napasamak, kinunada a bumabbaba ti biktima manipod iti panganan ken paturong iti nakaparada a taxi daytoy iti ballasiw ti kalsada idi limmabas dagiti suspek a nakalugan ti motorsiklo ken sadiay a pinalpaltoganda ti biktima.
Nakarekober ti PNP-SOCO iti 15 a basyo ti bala ti paltog manipud iti crime scene.
Iti agdama, im-imbestigaran dagiti pulis dagiti posible a nakasarita ken naka-text ti biktima sakbay ti insidente ken manarimaan pay ti panagbirukda no adda dagiti CCTV cameras a nakamuntar iti nasao a lugar a posible a pakakitaan dagiti suspek.
Kabayatanna, impetteng met dagiti kakabsat ti biktima nga awan ti ammoda nga iligal nga aktibidad ti kabsatda tapnu mapapatay daytoy.
Naiturong metten ti bangkay ti biktima iti maysa a punerarya ditoy siudad.
