Nagapalagip iti Bureau of Internal Revenue Cordillera kadagiti taxpayer a mangipila ken agbayad iti umno a buis sakbay ti deadline, nga Abril 15.
Sigun kenni Joseph Catapia, napateg ti nasapa a panangipila iti tax return ken umno a panagbayad tapno makatulong iti ekonomia iti pagilian.
Para iti tawen 2026, puntiria iti BIR a makaurnong iti P3.321 trillion, nu sadinno P11.059 bilyon ti puntiria para iti Cordillera.
Iti umuna a dua a bulan iti agdama a tawen, dumanon iti P1.61 bilyon ti nakolektar iti rehion.
Agtultuloy metlaeng ti modernisasion iti ahensia iti sidong ni Martin Mendoza babaen iti digital services a kas iti eBiz Lounge para iti nalaklaka a filing ken panagbayad iti buis.
Adda metlaeng iti programa a “Rangtay iti Serbisyo” nu sadinno maiturturong iti BIR ti serbisioda kadagiti komunidad, nangruna iti addayo a lugar.
